داخستن
بەرنامە کاتی پەخش دووبارە
هەواڵى سياسى 11:00 + 14:00 + 18:00 + 20:00 + 22:00 كورته‌ی هه‌واڵه‌كان + 23:00
باس و خواس 17:00، جگه‌ له‌رۆژانی پێنج شه‌ممه‌
دوانگه‌ی خه‌ڵك 17:00 ته‌نها رۆژانی پێنج شه‌ممه‌
ژێرخان 10:10 شه‌و، ته‌نها رۆژانی شه‌ممه‌
هەواڵی وەرزشی 11:30 + 18:30 + 23:30
ئەمرۆ 10:10 شەو، جگە لە رۆژانی هەینی و شه‌ممه‌ 03:00 نیوەرۆِی رۆژی دواتر
داخستن
كاته‌كانی بانگ به‌پێی شاری هه‌ولێری پایته‌ختی هه‌رێمی كوردستان
بەیانی 4:27
نیوه‌ڕۆ 11:54
عه‌سر 2:59
ئێواره‌ 5:48
خه‌وتنان 6:58

شه‌قوه‌شێن

لەتیف فاتیح فەرەج



حكومه‌تێك نه‌توانێ‌ ئاسایش و پۆلیسه‌كانی وا په‌روه‌رده‌ بكات، كه‌ په‌لاماری هاووڵاتی نه‌ده‌ن و شه‌قنه‌وه‌شێنن، ئه‌و حكومه‌ته‌ هه‌رگیز نه‌حكومه‌تێكی دیموكراسییه‌، نه‌ده‌توانێ‌ درێژه‌ به‌ ته‌مه‌نی خۆی بدات، په‌روه‌رده‌كردنی پۆلیس و ئاسایش و كادیری حزب، تا ده‌گاته‌ ئه‌ندامی پارله‌مان و سه‌ركردایه‌تی، له‌سه‌ر هه‌ڕه‌شه‌و چاوسوركردنه‌وه‌و شه‌ق وه‌شاندن و ده‌ستبردنی بۆ كه‌رامه‌تی مرۆڤ، په‌روه‌رده‌كردنێكی گه‌وجانه‌ی دیكتاتۆریانه‌یه‌، په‌روه‌رده‌كردنێكه‌ له‌ سه‌ر بنه‌مای به‌ دڕنده‌كردنی پاسه‌وان و  ده‌رگه‌وانه‌كانی حزب و ده‌سه‌ڵات، هانا بردن بۆ په‌لاماردانی ئینسانی سڤیل له‌ سه‌ر قسه‌كردن یان ده‌رده‌دڵ و ره‌خنه‌ یان "جنێوێك"، شتێكه‌ له‌ ده‌ره‌وه‌ی دۆخی مرۆیی.

په‌لاماردانی هاونیشتمانی  خۆت له‌ نێو بازاڕو به‌به‌رچاوی  خه‌ڵكه‌وه‌، به‌ ته‌نێ‌ له‌سه‌ر قسه‌یه‌ك و خۆ بادان و خۆ هه‌ڵنان به‌ چه‌ك و ده‌سه‌ڵاته‌وه‌، نه‌ ده‌سه‌ڵات خۆشه‌ویست ده‌كات نه‌ ته‌مه‌نی درێژده‌كات، هه‌ڵبه‌ت بابای شه‌قوه‌شێنیش به‌وه‌ نابێته‌ پاڵه‌وان، بابای شه‌قوه‌شێن هه‌ر ئه‌وه‌نده‌ پاڵه‌وانه‌ كه‌ چه‌كه‌كه‌ی به‌ ده‌ستیه‌وه‌یه‌و له‌ پشتیه‌وه‌ حكومه‌تێك هه‌یه‌، بێئاگا له‌وه‌ی حكومه‌ته‌كان ده‌ڕۆن و په‌یوه‌ندی كۆمه‌ڵایه‌تی و هاونیشتمانی ده‌مێننه‌وه.

شه‌قوه‌شێنه‌كان نه‌ڕوی خۆیان جوان ده‌كه‌ن نه‌ڕووی ده‌سه‌ڵات و خاوه‌نه‌كانیان، ئه‌وان بێئاگان له‌وه‌ی به‌ته‌نێ‌ به‌ توێكڵی شوتییه‌كه‌ ئه‌وكاره‌یان پێده‌كه‌ن، شه‌رمنایانگرێ‌ كه‌ لاسایی به‌عسیه‌كان ده‌كه‌نه‌وه‌، به‌ په‌لاماردانی كه‌سێكی بێچه‌ك به‌ر له‌وه‌ی هه‌ڕه‌شه‌ بێت بۆ سه‌ر خه‌ڵكی بێچه‌ك، هه‌ڕه‌شه‌یه‌ بۆسه‌ر خۆیان، چونكه‌ له‌ هه‌ناوی توڕه‌یی خه‌ڵكا شۆڕش و ڕاپه‌ڕین دروست ده‌بێت.

به‌عسییه‌كان هیچ نه‌ما ده‌رهه‌ق به‌ خه‌ڵكی كوردستان نه‌یكه‌ن، له‌ گه‌ڵ ئه‌وه‌شدا له‌ گه‌رمه‌ی ئه‌نفالدا له‌ ناو چه‌مچه‌ماڵ راپه‌ڕین به‌ ڕوی سته‌مدا كرا، ئه‌وڕۆژه‌ بارقی عه‌بدوڵا حاجی حنته‌، به‌ كۆپته‌ره‌كه‌ی خۆی و ده‌ی دیكه‌وه‌، به‌سه‌ر ئاسمانی چه‌مچه‌ماڵدا سوڕایه‌وه‌و خه‌ڵكی شه‌هیدو بریندار كرد، به‌ڵام نه‌یتوانی راپه‌ڕینی خه‌ڵكی كپكاته‌وه‌، سه‌ره‌ڕای ئه‌وه‌ی یه‌ك مانگ كه‌متر بوو كه‌ هه‌ڵه‌بجه‌ به‌ كیمیایی هه‌ناسه‌ی له‌ به‌ر بڕابوو، زه‌برو زه‌نگ هیچی لێسه‌وز نابێت، مه‌رگی سته‌مكاری نه‌بێت.

میله‌تانی دنیا مه‌رگی سته‌مكاره‌كان ده‌بینن و خۆیان ده‌مێننه‌وه‌، بۆیه‌ باشترین ڕێگه‌ بۆ سته‌مكاره‌كان، په‌روه‌رده‌كردنی شه‌قوه‌شێنه‌كانیانه‌ له‌سه‌ر به‌ گژدا نه‌چونه‌وه‌ی میلله‌ت، تا زیاتر ئازاری میلله‌ت بدرێ‌ زووتر سته‌مكارو دیكتاتۆره‌كان له‌ مه‌رگی خۆیان نزیك ده‌بنه‌وه.

له‌ هیچ كوێی دنیا به‌ڵته‌گی و شه‌قوه‌شێنه‌كان دادی ده‌سه‌ڵاتیان نه‌داوه‌، بۆیه‌ باشتره‌ له‌بری ناردنی شه‌قوه‌شێنه‌كان بۆ سه‌ر ده‌نگی ناڕه‌زای خه‌ڵك، وه‌ڵامی خواسته‌كانی خه‌ڵك بده‌نه‌وه.

943 جار خوێندراوەتەوە
02/10/2016

هەموو وتارەکانی ئەم نوسەرە