داخستن
بەرنامە کاتی پەخش دووبارە
هەواڵى سياسى 11:00 + 14:00 + 18:00 + 20:00 + 22:00 كورته‌ی هه‌واڵه‌كان + 23:00
باس و خواس 17:00، جگه‌ له‌رۆژانی پێنج شه‌ممه‌
دوانگه‌ی خه‌ڵك 17:00 ته‌نها رۆژانی پێنج شه‌ممه‌
ژێرخان 10:10 شه‌و، ته‌نها رۆژانی شه‌ممه‌
هەواڵی وەرزشی 11:30 + 18:30 + 23:30
ئەمرۆ 10:10 شەو، جگە لە رۆژانی هەینی و شه‌ممه‌ 03:00 نیوەرۆِی رۆژی دواتر
داخستن
كاته‌كانی بانگ به‌پێی شاری هه‌ولێری پایته‌ختی هه‌رێمی كوردستان
بەیانی 4:27
نیوه‌ڕۆ 11:54
عه‌سر 2:59
ئێواره‌ 5:48
خه‌وتنان 6:58

دۆخی هەرێم.. ئیرادە و چارەسەر!

هاوژین عومەر کەریم

 واقیعی پڕقەیران و گرفتاری هەرێمی کوردستان، هەڵوەستە و چارەسەری ڕیشەیی و ڕاستەقینە دەخوازێت، چارەسەری ڕاستەقینەش لەم میانەیەدا، لە چەند بژاردەیەک زیاتر نییە:

ـ یان هەموو هێزەکان دۆخەکە ببەنەوە پێش ماوەی دەستپێکردنی قەیرانەکان و تەسلیمی مەرجەعە یاسایی و دیموکراسییە سەردەمییەکان بن و کۆتایی بە ملهوڕیی و تاکڕەویی خۆیان بهێنن و بۆ قۆناغێک لەگەڵ دروشم و ئامانجەکانیان ڕاستگۆ بن، بەتایبەتیش هێزێکی وەکو پارتی و پاشانیش یەکێتی، ئەوجا گۆڕان و کۆمەڵ و یەکگرتوو.

ـ یان مادامێک هێزە کوردییەکان پێکەوە ناگەنە ئەو چارەسەرەی سەرەوە و لایەنێکی وەکو پارتی تاکلایەنە سووکایەتی بە ئیرادەی هێزەکانی دیکە و خەڵکی کوردستان دەکات و تەسلیمی حوکمی یاسا نابێت، دەکرێت هەندێک لەم هێزە کوردییانە بە هەماهەنگیی ژمارەیەک هێزی عێراقی و دامەزراوە یاساییەکانی ناوەند، فشار و هەوڵەکانیان لە دژی پارتی بخەنە گەڕ و قۆناغی دوای شەڕی داعش بکەنە قۆناغی یەکلاکردنەوەی حسابەکان لەگەڵ پارتی و دەرهێنانەوەی هەموو قەرزە سیاسی و ماددیی و یاساییەکان لە قوڕگیدا، ئەمەش هەنگاوێکی گرنگ دەبێت بۆ چارەسەری دۆخی هەرێم، هەروەک ئەم هەوڵەش ناچێتە چوارچێوەی خیانەت و خۆفرۆشییەوە، بەڵکو هەوڵێکە بە پێچەوانەی هەموو ئەوانە، ناپاکی لە هەرێم بریتییە لە نۆکەریی بۆ دەوڵەتی بێگانەی تورک و فارس و دژ بە کورد، نەک دەوڵەتێک کە تا ئێستاش بەپێی دەستوور و یاسا کارپێکراوەکان، کورد بەشێکە لە قەوارەکەی و دەرمانی نەخۆشخانە و پارەی گەنمی جوتیاران و پارەی بەشەخۆراکی مانگانەمان هەر لەوێوە دێن.

ـ یان ئەوەتا هێزە دیارەکان ڕادیکاڵانە ململانەکانیان لەگەڵ یەکدی دەست پێبکەن تا دەگاتە سنووری بەکارهێنانی هێزی چەکدار و یەکلاکردنەوەی دۆخەکە بەو شێوەیەی خۆیان مەیلی دەکەن، مادامێک هیچ سەنگ و ئیعتیبارێک بۆ یاسا و دامەزراوە یاساییەکانی هەرێم دانانرێت. یان جیاکردنەوەی سەرلەنوێی ئیدارە و سنووری دەسەڵاتی هێزەکان لە هەرێم، کە بەوەش هیوایەک بۆ قەوارەیەکی کوردیی یەکگرتوو و دامەزراو ناهێڵنەوە.

پارتی دیموکرات و یەکێتیی نیشتمانیی لە میانەی چارەکە سەدەیەک لە فەرمانناڕەوایی و دەسەڵاتدارییان، سەلماندیان کە دوو هێزن نە نیشتمانین و نە دیموکراتن، ئامادەن لەپێناو حەزی ئاژەڵانەی گرووپە بڕیاربەدەستەکانیان، هیچ حورمەت و هیوایەک بۆ یاسا، نیشتمانپەروەریی، مافەکانی تاکی کورد، خوێنی شەهیدان، ئایندەی کوردستان، دیموکراسیەت و فرەلایەنیی نەهێڵن.

لە دۆخێکی وەکو ئەمەی هەرێمی کوردستانی تێکەوتووە، مادامێک یاسا و بەها ئەخلاقی و سیاسی و دیموکراسییەکان رۆڵیان لە یەکلاکردنەوە و چارەسەرییەکاندا نەهێڵدراوە و ژێرپێ خراون، دەبێت هەموو ئەگەرەکانی تر وەکو ئەگەری کراوە و چاوەڕوانکراو تەماشا بکرێن.. ئێستا بە لای زۆرێک لە خەڵکییەوە ئەوە گرنگ نییە ململانەکە بە چی و چۆن دەکرێت و کێ پێشەوایەتیی دەکات، بەڵکو گرنگ یەکلاکردنەوەیەتی لە پێناو درێژەنەکێشانی ئەم لاسەنگی و قەیرانانەدا. ئەولەویەت پاراستنی تاکی کوردە بە خۆی و مافەکانی و کەرامەتیەوە، نەک موزایەدەکردن و فێڵکردن بە ناوی دەوڵەتی سەربەخۆ و شەرعییەتی شۆڕشگێڕیی و ڕیفراندۆم و قودسیەتی بنەماڵەوە، هەموو ئەوانە لەم دۆخە ناهەموارەدا، یەک عەیارە شیری منداڵێکی ساوای ماڵێکی هەژار و نەداری کورد ناهێنن!

483 جار خوێندراوەتەوە
16/05/2017

هەموو وتارەکانی ئەم نوسەرە