Frequencies
پەخشی راستەوخۆ
خشتەی بەرنامەکان کاتەکانی بانگ
داخستن
بەرنامە کاتی پەخش دووبارە
هەواڵى سياسى 11:00 + 14:00 + 18:00 + 20:00 + 22:00 كورته‌ی هه‌واڵه‌كان + 23:00
باس و خواس 17:00، جگه‌ له‌رۆژانی پێنج شه‌ممه‌
دوانگه‌ی خه‌ڵك 17:00 ته‌نها رۆژانی پێنج شه‌ممه‌
هەواڵی وەرزشی 11:30 + 18:30 + 23:30
ئەمرۆ 10:10 شەو، جگە لە رۆژانی هەینی و شه‌ممه‌ 03:00 نیوەرۆِی رۆژی دواتر
داخستن
كاته‌كانی بانگ به‌پێی شاری هه‌ولێری پایته‌ختی هه‌رێمی كوردستان

ڕاپه‌ڕین، ته‌نها وه‌ك ڕووداوێكی سیاسی

عومه‌ر گوڵپی

‌ڕاپه‌ڕین، ته‌نها وه‌ك ڕووداوێكی سیاسی !
عومه‌ر گوڵپی
    هه‌موو ڕاپه‌ڕینێك ئامانجێك یان كۆمه‌ڵه‌ ئامانجێك له‌گه‌ڵ خۆی بڵێسه‌ی پێداوه‌، یان ده‌كرێت بڵێین هیچ ڕووداوێكی سیاسی نییه‌ بێ‌ ئامانج بێت‌و له‌ خۆڕا به‌رپابووبێت.
ئامانجی ڕاپه‌ڕینی گه‌وره‌ی گه‌لی كورد، زیاتر بوون له‌و خه‌ون‌و خولیایه‌ی ته‌نها هێزێكی چه‌كدار هه‌یه‌تی له‌ هه‌رشوێنێكی دونیا، كه‌ به‌ ته‌نها گۆڕینی ده‌سته‌ی حكومداری وڵات بێت‌و هیچی تر، به‌ڵكو پێویست بوو گه‌لی كورد به‌ ڕاپه‌ڕین هه‌م ڕژێمێك بگۆڕێت‌و ده‌ستی كۆتاكا له‌سه‌ر خاكه‌كه‌ی، هه‌م پێویست بوو له‌نێو خۆو له‌نێو پێكهاته‌ی كۆمه‌ڵایه‌تیشدا گۆڕانكارییه‌كی ڕیشه‌یی بكات، له‌ یه‌كه‌میاندا كه‌ پێویستی به‌ هێزو ئیراده‌و بازوو  و خوێن به‌خشین هه‌یه‌ گه‌لی كوردو هێزه‌ سیاسییه‌كانی  سه‌ركه‌وتووبوون، به‌ڵام ئه‌وه‌ی شكستمان تیایدا خوارد ئامانجی گه‌وره‌و گرنگی دووه‌م بوو كه‌ هه‌ر ئه‌وه‌ش ده‌سه‌به‌رو پارێزه‌ری ده‌ستكه‌وت‌و ئامانجی یه‌كه‌مه‌.
لای كه‌سمان شاراوه‌ نییه‌ كه‌ زیاد له‌ هۆكارێك ئاماده‌ییان هه‌یه‌ له‌وه‌ی گه‌له‌كه‌مان له‌ پرۆسه‌ی بونیاتنانی كۆمه‌ڵگه‌و سیستمێكی فه‌رمانڕه‌وایی شایسته‌‌و گه‌شه‌پێدانی كۆمه‌ڵایه‌تی‌و په‌روه‌رده‌ی تاكدا نه‌وه‌ك هه‌ر شكستی هێنابێت، به‌ڵكو به‌ ئاستێك گه‌یشتووه‌ كه‌ هێندێكجار ته‌واوی ده‌ستكه‌وته‌ سیاسییه‌كانی ڕاپه‌ڕین‌و ئه‌وه‌ی به‌ خوێن‌و ئاره‌قه‌و بازووی گه‌نجه‌كان به‌رهه‌م هات، نزیك ببێته‌وه‌ له‌ تیاچوون.
هه‌موو ئه‌مانه‌ش به‌هۆی سیستمێكی سیاسییه‌وه‌ كه‌ هه‌ر له‌ بنه‌مادا له‌مه‌ باشتری لێ‌ چاوه‌ڕوان ناكرێت، سیستمێك كه‌ چه‌ند حزبێكی سیاسی به‌ ڕێژه‌ی جیا ڕه‌نگڕێژیان كردووه‌و ته‌نها ئه‌وه‌یه‌ داڕێژه‌رانی به‌ كوردی قسه‌ ده‌كه‌ن، ئه‌گه‌رنا گومان له‌ كوردبوونیان به‌ ته‌واوه‌تی ئاماده‌یی هه‌یه‌، ئاخر كه‌س‌و سه‌ركرده‌یه‌ك كورد بێت چۆن ئاماده‌یه‌ ته‌واوی وڵات‌و ئه‌زموون‌و سه‌روه‌ت‌و سامانه‌كه‌ی بكاته‌ قوربانی ده‌ستكه‌وته‌ سیاسی‌و حزبییه‌كانی خۆی، چۆن ئاماده‌یه‌ ته‌واوی سه‌روه‌ت‌و سامانی سه‌رزه‌مین‌و ژێر زه‌مینی گه‌لێك له‌ خزمه‌ت حزبێك یان خێزان‌و بنه‌ماڵه‌و ده‌سته‌یه‌كدا به‌كاربێنێت!؟
ئه‌و قه‌یرانه‌ی ئه‌مڕۆ به‌ ته‌واوه‌تی ده‌رئه‌نجامی ئه‌و بێباكی‌و نه‌بوونی سیستم‌و شكسته‌یه‌ كه‌ له‌ بواری فه‌رمانڕه‌واییدا هه‌مانه‌، شكستێك ته‌نها به‌ دروستكردنه‌وه‌ی ئیراده‌یه‌كی سیاسی به‌هێز ده‌كرێته‌ خاڵی هێز كه‌ تیایدا به‌ دوای به‌دیهێنانی ئامانجه‌كانی دووه‌می ڕاپه‌ڕیندا بگه‌ڕێت، ئامانجگه‌لێك ده‌سته‌به‌ری پاراستنی گه‌ل‌و ئه‌زموونه‌كه‌یه‌تی، ئیراده‌یه‌ك كه‌ به‌گژ گه‌نده‌ڵ‌و گه‌نده‌ڵكاراندا ده‌چێته‌وه‌، هه‌ركه‌س بن‌و هه‌رچه‌ند به‌هێزبن، واته‌ وه‌ستان له‌به‌ر ده‌م ئه‌و ده‌سته‌ی كه‌ سه‌رجه‌م توانا دارایی‌و سیاسی‌و دیپلۆماسی‌و ده‌سه‌ڵاته‌كانی بۆ خزمه‌تی خۆی به‌كاردێنێت، نه‌وه‌ك بۆ خزمه‌تی گه‌ل، ئه‌و ڕووبه‌ڕووبوونه‌وه‌یه‌ش كارێكی ئاسان نییه‌، سه‌ره‌ڕای ئه‌وه‌ی پێویسته‌ سووربین له‌سه‌ر ئه‌وه‌ی به‌ ئاشتی تێپه‌ڕێت، بۆ ئه‌وه‌ی لێ‌ نه‌گه‌ڕێین ده‌ستكه‌وته‌كانی ڕاپه‌ڕین ته‌نها ده‌ستكه‌وتێكی سیاسی بن‌و هیچی تر، به‌ڵكو ده‌ستكه‌وت‌و سه‌ركه‌وتنه‌كانی ڕاپه‌ڕین بچنه‌ بواری سیستم‌و فه‌رمانڕه‌وایی‌و په‌روه‌رده‌و كلتوره‌وه‌، ئه‌وه‌ی گه‌لان دروست ده‌كات .


1878 جار خوێندراوەتەوە
05/03/2016

هەموو وتارەکانی ئەم نوسەرە