Frequencies
پەخشی راستەوخۆ
خشتەی بەرنامەکان کاتەکانی بانگ
داخستن
بەرنامە کاتی پەخش دووبارە
هەواڵى سياسى 11:00 + 14:00 + 18:00 + 20:00 + 22:00 كورته‌ی هه‌واڵه‌كان + 23:00
باس و خواس 17:00، جگه‌ له‌رۆژانی پێنج شه‌ممه‌
دوانگه‌ی خه‌ڵك 17:00 ته‌نها رۆژانی پێنج شه‌ممه‌
هەواڵی وەرزشی 11:30 + 18:30 + 23:30
ئەمرۆ 10:10 شەو، جگە لە رۆژانی هەینی و شه‌ممه‌ 03:00 نیوەرۆِی رۆژی دواتر
داخستن
كاته‌كانی بانگ به‌پێی شاری هه‌ولێری پایته‌ختی هه‌رێمی كوردستان

1

ئیبراهیم موحەمەد



دوای دەرکەوتنی بوونی گزی و فزیەکی زۆر لەپرۆسەی هەڵبژاردن و بێ ئەرزش کردنی دەنگی هاوڵاتیان بۆ دیاری کردنی نوێنەرانیان لە ئەنجومەنی نوێنەرانی عێراقی، ئەو لایەنانەی زیانی زۆریان بەرکەوتووە و دەنگەکانیان دزراوە باس و خواسی بایکۆت کردنی ئەنجوونەنی نوێنەران و پرۆسەی سیاسی لە لایان بابەتێکی گەرمەو ئەندامان و هەوادارانیان بەشێوەیەکی گشتی ئەو بڕوایەیان هەیە کە بایکۆت چارەسەری ئەو بارودۆخەدەکات!

لێرەدا نامەوێت لێکدانەوە بۆ کۆی ئەو بابەتە بکەم بەڵکو دەمەوێت هەندێک خاڵی سەرەکی بخەمە ڕوو کە هاوکاری هەموو لایەک بێت بۆ ئەوەی هەنگاوێک نەنرێت لەقازانجی ئەوانە بێت کە گزی و فزەیەکەیان کردوە.

یەکەم: گرنگ و پێویستە ئەولایەنانەی دەنگەکانیان دزراوە کۆڵنەدەن تا دەنگە دزراوەکانیان بۆ دەگەرێتەوە و پارێزگاری لە مافی دەنگدەرەکانیان بکەن تا ئەو رادەیەی دزەکان جارێکی تر جورئەت نەکەن دەست بۆ دەنگی راستەقینەی هاولاتیان ببەن. بۆ ئەمەش پێویستە هەوڵکان لە چوار چێوەی بەیاننامە دەرچێت و میکانیزمی خەباتی مەدەنی بۆ دروست کردنی فشار تاو ئەو پەری بگرنە بەر.

دووەم: پێویستە دیراسەی هەنگاوەکان بەوردی بکرێت بە بایکۆتیشەوە. ئەوەی دەبینرێت و دەبیسترێت جێگەی تێرامانە چونکە راستەوخۆ بریاردان لە بایکۆتی پرۆسەی سیاسی لە بەغداد زیاتر لەکارێکی عاتیفیانەی پەرچەکردار نزیکە! بۆ دەبێت ئەو مەیدانە گرنگە چۆڵ بکرێت بۆ ئەوانەی دەنگی هاولاتیانیان دزیوە؟ لە کاتێکدا ئەوانە زۆر لە قازانجیانە ئەو بایکۆتە بکرێت و ئەو لایەنانە ئەو بریارە بدەن چونکە بۆ ماوەی چوار ساڵی داهاتوو تەنها خۆیان دەبن لە بغداد و ئەوانی تر پەراوێز دەخرێن و لە پرۆسەی سیاسی هیچ پێگەیەکی فەرمیان نابێت. بۆ یە لە کەمترین حاڵەتدا ئەوانەی دەنگی بایکۆتیان لە لامەبەستە دەبێت زۆر باش بزانن کە ئەوانەی گزی و تەزویریان کردووە خۆیان دەکەن بەنوێنەری هەموو کوردو بریاری لەبری هەمووی دەدەن. 

سێ یەم: ئەو ئارگومێنتەی کە دەڵێت بایکۆتی ئێمە شەرعیەت بە گزی و تەزویری ئەوان دەدات، پێم وایە لاوازە چونکە بە و بایکۆت کردنە پەرلەمانی داهاتوو فەشەل ناهێنت و ئەو ئەندام پەرلەمانەیش کە بەدەنگی دزراو دەچنە پەرلەمان بایکۆت رێگریان لێ ناکات بەلکو بۆ رێگری لەوەی ئەوانە نەتوانن سەوداو مامەڵەی نادروست بکەن بە مافی کوردەوە بەشداری کاراو هەماهەنگی لایەنە زیان لێ کەوتووەکان پێدەچێت باشترین بژاردەبێت.

چوارەم: ئەوەی لەهەرێمی کوردستان دەنگی دزیوە و تەزویری کردوە پەرلەمانی داهاتووی عێراق نەبووە بەلکو پارتی سیاسی کوردین وەک چۆن لەناوەراست و خواروی عێراقیش تەزویرات کراوە لەلایەن هێزە شیعی و سونیەکانەوە. بۆیە پێویستی بایکۆتی ئەوهێزانە بکرێت کە دەنگەکانی دزیوەو تەزویری کردووە نەک بایکۆتی دامەزراوەیەکی سیاسی وتشریعی بکەیت کە پێگەو رۆڵی گرنگ دەگێرێت لەداهاتوودا. 

ئەوەی دەنگی پێداویت بۆ ئەوەیە کە نوێنەرایەتی بکەیت و دژی ستەم و گەندەڵی بوەستیتەوە، لە بەغداش گرنگە کەسانێک هەبن و ئەوکارە بگرنە ئەستۆ وباشترینیش ئەو نوێنەرانەیە کە دەنگی پێویستیان هێناوە بۆ ئەنجوومەنی نوێنەران.

پینجەم: هەنگاوی کۆبوونەوەی پەرلەمان و هەڵوەشاندنەوەی هەلبژاردن و فشارەکان لەسەر کۆمسیۆن کارێکی یاسایی و سیاسی گرنگن بۆ بەدەست هێنانەوەی مافەکان و پێویستە کاری جددی لەسەر بکریت تاوەکو پەرلەمانی داهاتوو نوێنەرایەتی راستەقینەی هاوولاتیان بکات. 

شەشەم: ئەگەر تەزویر و گزی و دزینی دەنگ پاساوبێت بۆ بایکۆتی پرۆسەی سیاسی ئەوا دەبوو لەهەموو هەڵبژاردنەکانی رابردوو کە لە عێراق و کوردستان کراوە جگە لە دوو هێزی دەستەڵات هیچ لایەنێکی تر بەشدار نەبوایە لە پەرلەمانی کوردستان و عێراق چونکە لە هەموویان تەزویر کراوە و کەسانێک هەبوون بەدەنگی تەزویری مردووەکان بووە بە پەرلەمانتار. تەنها جیاوازی ئەم جارە بەشێوەی ئەلیکترۆنی دەنگی لایەنەکانی تریان بۆ خۆیان حساب کردوە و بەلام جارانی پێشوو ئەندامە حزبی یەکانیان چەندین جار دەنگیان دەداو مردوەکانیش نوێنەریان هەبوو لە نێو پەرلەمانتارەکاندا. بەڵام لە هەمان کاتدا لایەنکانی ئۆپۆزسیۆن بەشداری کارایان هەبووە و چەند بابەتی گرنگ و دەتکەوتیان هەبوە ئەگەر بایکۆتی پرۆسەی سیاسیان کردبایە ئەوا ئەو دەست کەوتانە بەدی نەدەهات.

بۆ یە پێویستە هەموو هەوڵە سیاسی و یاسایی و مەدەنی یەکان بۆ گێرانەوەی دەنگە دزراوەکان و هەڵوەشاندنەوەی هەڵبژاردن بەشێوەیەکی گشتی یان جزئی بەردەوام بێت و کاری جددی لەسەر بکرێت.لەهەمان کاتیشدا پلانی جددی هەبێت بۆ ئەوەی چۆن لە بەغدا لایەنە زیان لێ کەوتوەکان بەشداری لە پرۆسەی سیاسیدا بکەن و ببنە بەرگری کاری مافی هاوولاتیان و ئەو ئومێدەی کەدەنگدەرانیان هەیانە بهێننە دێ لە دادگەری و وەستانەوە دژی ستەم و گەندەڵی.


361 جار خوێندراوەتەوە
27/05/2018

هەموو وتارەکانی ئەم نوسەرە