Frequencies
پەخشی راستەوخۆ
خشتەی بەرنامەکان کاتەکانی بانگ
داخستن
بەرنامە کاتی پەخش دووبارە
هەواڵى سياسى 11:00 + 14:00 + 18:00 + 20:00 + 22:00 كورته‌ی هه‌واڵه‌كان + 23:00
باس و خواس 17:00، جگه‌ له‌رۆژانی پێنج شه‌ممه‌
دوانگه‌ی خه‌ڵك 17:00 ته‌نها رۆژانی پێنج شه‌ممه‌
هەواڵی وەرزشی 11:30 + 18:30 + 23:30
ئەمرۆ 10:10 شەو، جگە لە رۆژانی هەینی و شه‌ممه‌ 03:00 نیوەرۆِی رۆژی دواتر
داخستن
كاته‌كانی بانگ به‌پێی شاری هه‌ولێری پایته‌ختی هه‌رێمی كوردستان

دكتۆر بەرهەم و یەكێتیی ، ئیسلامییەكان و هاوپەیمانی

ئارام علی سعید

‌بەدەر لەو بۆچوون و هێرشە جیاوازانەی لەچەند ڕۆژی ڕابردوودا كرایە سەر دكتۆر بەرهەم صاڵح و هاوپەیمانێتیە سیاسییەكەی ،
پاشان ئیسلامییەكانی ناو ئەم هاوپەیمانیە،  ڕای تایبەتی خۆمم هەیە لەسەر گەڕانەوەی دكتۆر بۆناو یەكێتی و ئەو تەرزە فیكرییە جیاوازانەی لەنێو بزووتنەوەكەی دكتۆر كۆبوونەتەوە بەتایبەتی ئیسلامییەكان.

هەموومان لەكوردستان دەزانین دكتۆر بەرهەم ئەحمەد صاڵح پیاوێكی ئەمریكیەو جووڵەو بزاوتی لەفەلەكی ئەمریكاو نزیكایەتی سیاسەتەكانی ئەو وڵاتە دەسووڕێتەوە، هەمیشە وەك پرۆژەی ئەمریكا وێناكراوە لەكوردستان، ناوبراو خاوەنی پرۆژەی زانكۆی ئەمریكی و دەسگرتن بە سیاسەتەكانیەوەیەتی لە هەرێمی كوردستان و بگرە عێراقیش، چونكە ئەمریكا بەرژەوەندییەكانی لەم ناوچەیە بەرفراوانە،
 هەوڵەكانی برێت مەكگۆركی نێردەی ئەمریكا لەگەڵ بەرپرسانی یەكێتیی بۆ گەڕانەوەی دكتۆر و فشار دروستكردن لەسەر ئەم هێزە بەڵگەی ئەو ڕاستیەن ، بۆیە هەر قسەكردنێك لەسەر ئەم كارەكتەرە لە دەرەوەی دۆخی ئاسایش و بەرژەوەندی باڵاو سیاسەتی هەرێمایەتی و نێودەوڵەتی و ململانێكان لەناوچەكەداو ئەو پێدراوو سیناریۆیانەی ژێربەژێر دەگوزەرێت زیادەیە و كاڵ تێگەیشتنە لە دۆخەكە،
 ئەوەی سەتحیانە لەم گەڕانەوەی بەرهەم دەڕوانێت بۆ ناو یەكێتی و بەدیدە كلاسیكیەكەی ناوشۆڕش و شەڕی نێوخۆو مەیلی سەنگەر گواستنەوە خوێندنەوەی بۆ دەكات ماویەتی لەوسیاسەتە بگات كە ئەم ڕووداوەی دروستكردووە، ئەو سیاسەتەی لە هەڵبژاردنەكانی 12ی ئایاری ڕابردوودا كورسیەكانی ئەم هێزانەی چەند هێندە بردە سەرەوەو ئەنجامی بۆ دیاریكردن هەمان ئەو سیاسەتەشە كاك بەرهەمی خستەوە ماڵە باوانی سیاسەت و حزب، ناوبراو لەئێستادا بەشێكە لەو هاوكێشەو ململانێ گەرمەی لەنێوچەكەدا دەگوزەرێت بەتایبەتی بەغداو تاران و هەولێر،
 ئەم ئەكتەرێكی ئەو سیناریۆیەیە كە هەنووكە ململانێكار لە ساتەوەختی داڕشتن و دەرهێنانیەتی و لەوانەیە لەئایندەدا بەچاوی سەر بیبینین و لێكەوتەكانیشی دەربكەوێت، بۆیە سەرەتای دروستكردنی ئەو هێزە لەلایەن دكتۆرو بەشێك لە هاوبیرانیەوە لە گوتارەكەیەوە ڕوون بوو كە نەیدەتوانی بە هەمان تایپی هێزە ئۆپۆزسیۆنەكانی دی موخاتەبەی دەسەڵات بكات، هێزەكەی سیاسەتێكی شەرمنانەو ناڕوون و پڕجووڵەی دژیەك و ئاڵۆزی هەبوو،
 جگە لەوەی خۆی هەمیشە چاوەڕوانی ئەوەی دەكرد فەرمووی لێ بكرێت لەبەرامبەر بەخشینی پلەیەكی باڵا لەدەسەڵاتی سیاسیی، كە ئەمەیان بەبڕوای من زۆربەهێز نیە، بۆیە ئەم گەڕانەوەیە پێداویستی پراكتیزەكردنی ئەجێندا هەرێمی و نێودەوڵەتیەكانەو كەمێكیش سیاسەتی ناوخۆی یەكێتی بەتایبەتی بۆئەوانەی لەخوارەوەی ئەو حزبەن و وەك جۆرێك لە شكۆی گەڕانەوەی هێز بۆ حزبەكەیان لێی دەڕوانن و سۆزدارانە خۆیان بە خاوەن حەق و مەشروعیەتی سیاسی دەزانن وەك هێزێكی خاوەن نفوز لە ڕابردوودا.

لەلایەكی دی بوونی كۆنە ئیسلامییەكان لەناو ئەم هێزەداو بژاردەی كاری سیاسییان لەگەڵ خۆبە"عەلمانی" زانەكانی ناو یەكێتی تەواوكەری هەمان سیاسەتی گشتی ململانێكانە لەناوچەكەدا، بەتایبەتی بۆ لاوازكردنی ئیسلامییەكان، جاران بە بەرتەسككردنەوەی ئازادی و گرتن و لێدان و تیرۆرو میكانیزمی توند بەرەنگاری هێزە ئیسلامییەكان دەكرا لەكوردستان، بەتایبەتی لەلایەن یەكێتییەوە،
 بەڵام ئێستا ڕێگای ئاسانترو لەسەرخۆتر دۆزراوەتەوە بەناوی كرانەوەو پاساوی دیكتاتۆرییەتی ناوهێزە ئیسلامیەكان و تێكەڵبوونەوە بەجەماوەر ئەم هێزانە لاواز دەكرێت، واتە بەریەككەوتنی فیكری "ئیسلامی ـ عەلمانی" و دیدە ئایدۆلۆژییەكە كاڵكراوەتەوەو دەرفەتی جیاواز بۆ ئەوانە دەستەبەركراوە كە لەناو هێزە ئیسلامیەكانەوە پەرواز دەكەن بۆ دەرەوەی خۆیان،
 بۆیە پێكهاتەی زۆری بەشێك لەم هێزە نوێیانە بە تایبەتی بزووتنەوەی گۆڕان و هاوپەیمانی و تاڕادەیەك نەوەی نوێ ـ و هەندێجاریش پارتی و یەكێتی"نموونەش زۆرە"، لە مەعدەنی ئیسلامییەكانن بەتایبەتی یەكگرتوو كۆمەڵ، یاخود ئەو ئیسلامیانەی كە پێشووتر نیگەران بوون لەحزبەكانیان و بیانووی داخراوی و دواكەوتوویی و مۆنۆپۆلكردنی دەسەڵاتی ئیداری حزبییان لەناو حزبەكانی پێشووی خۆیان كردووەتە پاساوی وازهێنانیان،
 ئەمەش بۆخۆی مۆدێلێكی نوێیە لەپاشەكشەو جیابوونەوەو سەنگەر گواستنەوە،
 بۆیە بڕوام نیە بەسانایی ئەم دیدە كە لەمێژووی ڕابردووی ململانێكانەوە هاتووە ڕیشەكێش بكرێت، كەواتە ئەوەی دەوترێت و دەكرێتە بیروڕا لەسەر ئەمانە جگە لەپەرچەكردارو سادەیی تێگەیشتن لەو تایپ و مۆدێلە نوێیەی سیناریۆكان هیچی دی نیە، ئەو پێشنیارانەشی دەكرێت بۆ گەڕانەوەو هاتنەوەی ئەمانە بەتەعبیری هەندێك"ماڵە گەورە"و "ماڵ ماڵی خۆیانە"و هەر "براو باوكی ئێمە بوون" دیسانەوە تەنك حاڵیبوون و ناتێگەیشتنە لەوەی هەنووكە بوونی هەیە، پێموایە كاتی ئەوە هاتووە لەقۆزاخەی ئەم عەقڵیەتە بێینە دەرەوە،
 ئەوەی فەیسبووكەوانەكان لەم چەند ڕۆژە كردیان بەرامبەر بەیەك تایبەت بە وازهێنانی دكتۆر بەرهەم و ڕۆڵ و پێگەو مانەوەی ئیسلامییەكان لەناو هێزەكەیدا بۆ لەمەودوا جگە لەكەفوكوڵێكی سایكۆلۆژی  بەشێك لە وێناكردنی نەگونجاو بوو بۆ دۆخەكە هیچی دی نەبوو،
چونكە هیچ لەم بۆچوونانە بەدیلی لۆژیكی و مەعریفەی سیاسییان نەدركاند بۆ چارەسەری ئەو خیلاف و جیاوازییانەی دروست بوو بوون هەر لە جیاوازییە فیكری و ڕێكخراوەییەكانەوە تاوەكو جیاوازی میكانیزمی ئیداری و شێوازی بەڕێوەبردنی حزب و گوتاری دینی و سیاسیی و تەنانەت ئەو جیاوازییە شەخسی و گرێ دەروونیانەش كە دۆخەكەیان دروستكردووە،
تەواوی ئەمانە بۆخۆیان كۆسپەكانن، شیاوتر وایە لەبری لێدوانی عاتیفی و تەشهیرو شكاندنی یەك بەناوی شكستەوە بیر لە میكانیزمەكانی چارەسەرو لێك نزیككردنەوە بكرێت بۆ هەردوولا ، ئەویش بە تەنازولكردن لەبەشێك لەو خواستانەی ئیسلامییەكانیشی تووشی ئەم فۆڕمە لە زویربوون و جیابوونەوەو وازهێنان كردووە لە هاوبیرایەتی یەكتر.

683 جار خوێندراوەتەوە
22/09/2018

هەموو وتارەکانی ئەم نوسەرە