Frequencies
پەخشی راستەوخۆ
خشتەی بەرنامەکان کاتەکانی بانگ
داخستن
بەرنامە کاتی پەخش دووبارە
هەواڵى سياسى 11:00 + 14:00 + 18:00 + 20:00 + 22:00 كورته‌ی هه‌واڵه‌كان + 23:00
باس و خواس 17:00، جگه‌ له‌رۆژانی پێنج شه‌ممه‌
دوانگه‌ی خه‌ڵك 17:00 ته‌نها رۆژانی پێنج شه‌ممه‌
هەواڵی وەرزشی 11:30 + 18:30 + 23:30
ئەمرۆ 10:10 شەو، جگە لە رۆژانی هەینی و شه‌ممه‌ 03:00 نیوەرۆِی رۆژی دواتر
داخستن
كاته‌كانی بانگ به‌پێی شاری هه‌ولێری پایته‌ختی هه‌رێمی كوردستان

7ی‌ 3، ڕۆژێك كه‌ له‌ وشه‌كاندا بۆم به‌رجه‌سته‌ نابێت

عومه‌ر گوڵپی


سبه‌ی‌ 7ی‌ 3یه‌، بیست و هەشت ساڵ تێپه‌ڕ ده‌بێت به‌سه‌ر ڕاپه‌ڕینی‌ شاری‌ سلێمانیدا، 28 ساڵ له‌مه‌وپێش، بۆ من‌و خانه‌واده‌ی‌ ئێمه‌ چاوه‌ڕوانی‌ بوو بۆ له‌ دایكبوون، بۆ ژیانه‌وه‌، بۆ بینینه‌وه‌ی‌ براكان، شه‌هید موحه‌ممه‌دو شه‌هید ئه‌حمه‌دو كاك ئه‌بوبه‌كرو هاوڕێكانیان له‌ زیندانیانی‌ ڕێگەی‌ خه‌بات‌و تێكۆشان.

به‌ڵام ئه‌وه‌ی‌ ئێمه‌ چاوه‌ڕێمان ده‌كرد به‌ شكانی‌ ده‌رگاكانی‌ ئه‌منه‌ سوره‌كه‌ ڕووبدات، بۆ ئێمه‌ ڕووی‌ نه‌دا، ئه‌و چاوه‌ڕوانیه‌ گەورەیە تاقەت پڕوکێنەی‌ كه‌ 28 ساڵ له‌مەوپێش لە سلێمانی‌ ته‌نها و ته‌نها ئێمه‌ هه‌مان بوو، واته‌ ئه‌وانه‌ی‌ كه‌ كه‌س‌و كاریان له‌ زیندان بوون‌و هیچ هه‌واڵێكیان نه‌ده‌زانین.

خۆشحاڵ بووین، تاسابووین، ده‌رگاكان شكان، ئه‌منه‌ سووره‌كه‌ كه‌وته‌ ده‌ست خه‌ڵك، دووكه‌ڵ هێشتا له‌ بینا سێ قاته‌ ناوچاو تاڵه‌كه‌ به‌رزده‌بوویه‌وه‌، كوڕو كچی‌ كورد هاتنه‌ ده‌ره‌وه‌، هه‌موو خۆشحاڵ بووین به‌و جه‌ژنه‌و به‌و كه‌رنه‌ڤاڵه‌ گه‌وره‌یه‌، ئه‌گه‌رچی‌ دڵی‌ ئێمه‌ به‌ یه‌كجاری‌ شكا، ئه‌وه‌ی‌ چاوه‌ڕوان بووین نه‌مانبینی‌، نه‌ به‌زیندوویی‌ نه‌ به‌ شه‌هیدی‌، نه‌ خه‌نده‌و پێكه‌نینیان نه‌ جه‌سته‌ی‌ گه‌نج‌و گه‌نم ڕه‌نگیان، براكان بۆ هه‌تا هه‌تایه‌ وه‌ك ئه‌و هه‌ورانه‌ی‌ شنه‌بای‌ به‌هار لێمانیان دوور ده‌خاته‌وه‌، له‌به‌رچاو ون بوون و نه‌مان بینینه‌وه‌، نه‌ ئه‌وان نه‌ 24 هاوڕێكانیان.

له‌ زیندانی‌ ئه‌منه‌ سووره‌كه‌ی‌ سلێمانی‌ ده‌یان و سه‌دان قاره‌مان له‌وێ بوون، یه‌كێك له‌ هاوبیره‌كانی‌ شه‌هید موحه‌ممه‌دو شه‌هید ئه‌حمه‌دی‌ برام‌و سه‌رجه‌م شه‌هیدان‌و تێكۆشه‌رانی‌ تر کە چیرۆکەکەی‌ زۆر سەرنج ڕاکێشەو ناکرێت باسی‌ ڕاپەڕین بکەین و باسی‌ ئەو قارەمانە نەکەین، ئەویش موحه‌ممه‌دی‌ حاجی‌ مه‌حمودە، ته‌نها یه‌ك ڕۆژ پێش ئه‌وه‌ی‌ بینای‌ ئه‌منه‌ سووره‌كه‌ بگیرێت، واته‌ دووه‌م ڕۆژی‌ ڕاپه‌ڕینی‌ سلێمانی‌، 8ی‌ 3ی‌ 1991، ئه‌منه‌كان شه‌هیدیان كردوو كاتێك خه‌ڵك چوونه‌ ژوره‌وه‌ بۆ بیناكه‌ ته‌نها ته‌رمی‌ شه‌هید موحه‌ممه‌دیان وه‌رگرته‌وه‌.

لەسەر زاری‌ ئەوانەی‌ لە زیندان هاوڕێیی‌ بوون و خوا ئەو خۆشیەی‌ بە نسیب کردن و بە سەربەرزی‌ هاتنە دەرەوە لە زیندان، چیرۆكه‌كه‌یم وا بیستووه‌: به‌ڕێوه‌به‌ری‌ ئه‌منی‌ سلێمانی‌ ئه‌چێته‌ ناو زیندانه‌كان، جنێو به‌ كه‌س‌و كاری‌ زیندانییه‌كان ده‌دات كه‌ ڕاپه‌ڕیون‌و په‌لاماریان ده‌ده‌ن و هەڵدەکوتنە سەریان، موحه‌ممه‌دی‌ حاجی‌ مه‌حمودیش وه‌ك شێر، وه‌ك گه‌نجێكی‌ سنگ پڕ له‌ باوەڕو قورئان و نه‌ترسان، لێی‌ هه‌ڵده‌گه‌ڕێته‌وه‌، ناتوانێت قبوڵ بکات به‌ڕێوه‌به‌ری‌ ئه‌من جنێو به‌ كه‌س‌و كاریان بدات و خۆی‌ پێ ڕاناگیرێت، بۆیه‌ بێ باك له‌ زیندان و ترس‌و بیم‌و فیشه‌ك‌و سێداره‌و ترسی‌ بەعسیەکان، پڕ به‌ ده‌می‌ تفێك ئه‌كاته‌ ناوچاوی‌ به‌ڕێوه‌به‌ری‌ ئه‌من‌و پێیان ده‌ڵێت ته‌نها چه‌ند سه‌عاتێكی‌ تر خۆتان بگرن، یه‌ك یه‌ك ده‌تان كوژین! کەس و کارمان و پێشمەرگە تۆڵەتان لێ دەکەنەوە ... هه‌ی‌ هاوار شەهید موحەممەد، تۆ له‌ چ دایك‌و باوكێكی‌؟! تۆ چ دڵێكت هه‌بوو شه‌هید موحه‌ممه‌د؟

به‌ڕێوه‌به‌ری‌ ئه‌منیش به‌و داخه‌وه‌ ده‌چێته‌ دەرەوە لە هۆڵی‌ زیندانەکان، یه‌ك ده‌به‌ تێزاب ئاماده‌ ده‌كات‌و داوا ده‌كات موحه‌ممه‌دی‌ حاجی‌ مه‌حمودی‌ بۆ بهێنن، به‌داخه‌وه‌ له‌ گۆڕه‌پانی‌ ئه‌منی‌ سلێمانی‌ به‌ ده‌ستی‌ به‌ڕێوه‌به‌ری‌ ئه‌من‌و جه‌لاده‌كانی‌ تری‌ بەعس شه‌هید كرا، ڕێك ڕۆژی‌ 8ی‌ 3، ئه‌و ڕۆژه‌ی‌ كه‌ چوارده‌وری‌ ئه‌منه‌كه‌ گیرابوو و خه‌ریك بوو پێشمه‌رگه‌و خه‌ڵك ئه‌منی‌ سلێمانی‌ كۆنترۆڵ بكه‌ن، بە ڕاستی‌ چیرۆکی‌ ئەم شەهیدە شایستەیە بەوەی‌ هەموو منداڵێکی‌ کورد لەبەری‌ بکات.

سڵاو له‌ ڕوحی‌ پاكتان شه‌هید موحه‌ممه‌دو شه‌هید ئه‌حمه‌دو شه‌هید موحه‌ممه‌دی‌ حاجی‌ مه‌حمودو شه‌هید كه‌یوان و شه‌هید موساو شه‌هیدانی‌ تری‌ هاوڕێیان‌و سه‌رجه‌م شه‌هیدانی‌ ڕێگه‌ی‌ ڕزگاری‌ ‌و ئازادی‌‌و سه‌ربه‌رزی‌.

ڕوحی‌ ئه‌و شه‌هیدانه‌ داوا له‌هه‌ر كوردێك ده‌كات خیانه‌ت له‌ وڵاته‌كه‌ی‌ نه‌كات، خیانه‌ت له‌ خه‌ڵك نه‌كات، ده‌ست پاك‌و ئه‌مانه‌ت پارێزو دڵسۆزو خزمه‌تكاربێت، قوربانیه‌كان بۆ بازرگانی‌ و بۆ پۆست‌و پله‌ وه‌رگرتن نین، بۆ ئەوە نین کەس بخەنە سەرو یاساو سیستم و بەرژەوەندی‌ گشتیەوە، بۆ ئه‌وه‌ن ویژدانمان زیندوو ڕابگرین و به‌ وه‌فابین به‌رانبه‌ریان و وڵات دروست بكه‌ین و نه‌وه‌كانمان له‌سه‌ر ئازادی‌و خۆشه‌ویستی‌ وڵات ڕابێنین و دژی‌ سته‌م‌و چه‌وسانه‌وه‌و گه‌نده‌ڵی‌‌و دیكتاتۆری‌ بین و عەدالەت بەدیبهێنین.

172 جار خوێندراوەتەوە
06/03/2019

هەموو وتارەکانی ئەم نوسەرە